（前言︰這篇文章概念源自某網絡笑話， 再加上本人大量修改和僭建而成， 亦曾於以前任職之雜誌上刊出， 所以如果你看過篇文章的話， 可能已可知道本人曾任職那本雜誌了）
當你渴望成為一名攝影大 C， 當然唔可能用部 SNAP DC 見人， 於你花萬幾銀買部單鏡反光機返來， 頭兩日你影得好開心， 因為部機的確係︰ 近。 然後過多幾日你會發現︰ 冇枝燈的話其實好多時會炒粉。 於是熱心的你就花多幾千銀買多枝閃。 再過多幾日，你發覺就咁影相的話張相其實冇乜特別， 於是你發覺鏡頭係一個好重要因素之一， 而隨機套 len 又有點兒雞肋， 於是為了玩焦距，你決定花多幾千銀買支鏡。
過了一段風平靜的日子後， 你開始嫌棄舊鏡頭， 事關你認為佢質素太低。你有一日午夜夢迴見到有一枝鏡一次過滿足你 N 個願望， 唔食唔痾幾個月後你終於儲夠錢， 買起支夢中情人。試拍報紙和磚牆的結果表明呢支高素質鏡頭果然不負眾望。 好可惜影多幾影， 你就發現呢支貴幾倍又重幾倍的高質鏡頭同你原本支低質鏡頭無乜分別。畢竟平時影風景用細光圈多， 聚焦不實的時候其用乜鏡頭都不清楚。 至於影人， MODEL 心情差質素低的時候其實點影都依然咁難睇。
已花費巨額買單鏡反光機、 燈、 鏡頭… 等等， 但為甚麼影出來的效果仍然和一部傻瓜機無分別呢？ 點算？
於是，你開始懷疑可能係支 PRO 鏡唔夠 PRO，又或者係部 PRO 機唔夠快。你甚至對部機開始有少少厭惡。於是，你又開始留意各大攝影雜誌網站，冇幾耐，你就留意到就快有部「999D PRO 167 MARK 10 SE UPGRADE VER.2004 SP1」的新機就快推出。為免新機推出之時大批人爭相放機做壞個二手價，心急換機的你，即時去唔相熟之二手鋪問價，經過一輪心理以及生理拉鋸戰後，你部 600 萬像素舊愛以一個 10 萬像素手提電話之價錢賣出。
賣出後，你收拾心情等待新機推出。
好衰唔衰，部新機 DELAY。
半年後，你以三個月人工的價錢買入新機。為了供機，你不得不搵多幾份 PART-TIME，朝七晚十一的工作時間令你買機返來後一直無機會試影。不睡不休工作半年後，你終於有第一日假期（仲要係星期日，陰功）出去影相。去到旺角行人影女專用區，你發覺當時有 EVENT 進行中，原來係某本連累你傾家蕩產之攝影雜誌攪緊影女活動。你當於唔會放過呢個機會，一於仆埋去影，當你影得好高興之時，望一望隔離條影女影得好高興的咸濕仔，咦，乜佢部機咁似我呢部？但睇真D，佢部機．係．彩．色．版。而你部機，係黑色。 橫睇掂睇彩色版都 PRO 過黑色版好多丫。用左佢即時唔識影相都變得好似影得好掂。 咦？彩色版？幾時推出的？
你發現有彩色版之後，你極傷心，極失落，但唔緊要，相機係要來影相，唔係哂命，right？於是你重拾精神，發奮影靚相。當然，影了幾日郊外大自然風景後，你開始厭惡，慢慢你會發現，鬧市內影相更好，因為張相一定「多野睇」，又車又人又高樓大廈又多顏色，易構圖，方便。發現呢個秘密之後，你帶齊全副武裝，成個實Q般企鬧市街頭找尋獵物，未幾，你在公園發現一個男人撩一名幼童玩緊，當時個男人背住你，於是你拎起部機，半按快門之際，個男人突然轉身，望住你。於是你發現佢副惡相，同時亦發現佢心口堆紋身，以及面上的一大條刀疤。
今次死裡逃生後，你發現原來帶住咁大堆頭出街影相會帶來生命危險。成為攝影大C之夢受到嚴重打擊。點算？點算？茶飯不思數日後，你終於發覺，其實構圖、照片內容比追求光暗、焦距更重要。為左實現前者的追求，其實你冇乜可能帶住全副武裝去影相，特別當閣下係一個正常男人，被攝者通常會當你係一個正常的色狼，通常都冇乜好下場。如果真係想捕捉鬧市中決定性的瞬間，成為攝影大C，唯一方法，係，就係… …用 SNAP SHOT DC。
